लेटाङ, २३ असार । लेटाङ बजारबाट नजिकै रहेको रमणीय झरना हो– देउजे । यो झरना लेटाङ बजारबाट ४ किलोमिटर दूरीमा छ । पहाडको फेदीमा लमतन्न सुतेको लेटाङ बजारको बीचबाट उत्तरतर्फ रहेको फराकिलो सडक हुँदै २ किलोमिटर अघि बढ्दा थुम्कोमाथिको रमणीय गुवाबारी पुगिन्छ ।
गुवाबारीवाट थोरै अघि बढेपछि पश्चिमतर्फ लाग्ने कच्ची सडक आउँछ । यात्रालाई यही कच्ची सडकतर्फ मोड्नुपर्छ । यात्रा अघि बढ्दै गएपछि कन्चन पानी बग्ने खोला आउन थाल्छन् । माथितिर पहाडका बीचबाट बगेका साना तर सुन्दर खोला तर्दै अघि बढ्नु पर्छ । अलि पर गएपछि देउजे खोला आउँछ । यहाँ बग्ने अरु खोलाभन्दा यो अलि ठूलो छ ।
त्यहाँबाट अझ अघि बढेपछि सडकको दाहिनेतर्फ एउटा मनमोहक झरना देख्न पाइन्छ । त्यही हो– देउजे झरना । यसलाई कसैले निगुरे भन्छन् त कसैले राते । करिब ३० मिटर माथिवाट छङछङ पानी खसिरहेको दृश्यले यहाँ पुग्ने जोकोहीलाई मोहित बनाउँछ । हिउँदको समयमा झरनामा पानी अलि कम हुन्छ ।
देउजे झरना हुँदै अघि बढेको सडक धनकुटाको ६ नम्बर बुधबारे निस्कन्छ । घना जंगल रहेकाले यहाँ केही खानेकुरा पाइँदैन । बर्षाको समयमा यात्रा पनि अरुबेला जस्तो सहज हुँदैन । मोटरसाइकल भने सहजै पुग्छन् । देउजे झरनाको सौन्दर्यमा रमाएपछि खाजा खान गुवाबारी पुग्नु पर्छ । त्यहाँ व्यवस्थित होटलहरु ग्राहकको पर्खाइमा हुन्छन् । लेटाङ बजारको शिरैमा रहेको यो गुवाबारी भिडभाडवाट आफूलाई टाढा राख्ने र मौलिक खानेकुराको स्वाद लिन चाहनेहरुको मुख्य गन्तव्यका रुपमा स्थापित भइरहेको छ ।