उर्लाबारी । मोरङको उर्लावारीमा स्थानीय व्यापारीहरुका लागि लेखा र राजश्व सम्बन्धि २ दिने तालिम सञ्चालन गरिएको छ । स्थानीय ५० जना व्यापारीहरुको सहभागिता रहेको तालिममा प्रशिक्षक जीवन बस्नेतले सहजिकरण गरे । व्रिटिस ल्यांग्वेज एण्ड आइटी कलेज उर्लाबारी र उर्लाबारी नगरपालिकाको संयुक्त आयोजनामा वडा नम्बर ७ को स्विकृत योजना अनुसार तालिम सञ्चालन गरिएको व्रिटिस ल्यांग्वेज एण्ड आइटी कलेज उर्लाबारीका प्रोप्राइटर राज गुरागाईंले जानकारी दिए ।
व्यापारीहरुमा लेखा र राजश्व सम्बन्धी आधारभुत ज्ञान नहुँदा व्यापार व्यवसायको हिसाव किताव राख्न तथा सरकारलाई कर तिर्नुपर्दा विभिन्न अस्पष्टता देखिएको गुनासो आएकाले तालिम सञ्चालन गरिएको वडा नम्बर ७ का वडाध्यक्ष वीरबल थापाले बताए । वडाध्यक्ष थापाको प्रमुख आतिथ्यतामा भएको तालिमको उद्घाटन कार्यक्रममा उद्योग वाणिज्य संघ उर्लाबारीका अध्यक्ष भरतबहादुर भट्टराई, सुनचाँदी व्यवसायी संघ उर्लाबारीका अध्यक्ष प्रितम खड्गी लगायतको समेत उपस्थिति रहेको थियो । कार्यक्रमको अध्यक्षता व्रिटिस ल्यांग्वेज एण्ड आइटी कलेज उर्लाबारीका प्रोप्राइटर राज गुरागाईंले गरेका थिए भने मकालु टेलिभिजनका रेवती निरौलाले कार्यक्रम सञ्चालन गरेका थिए ।