विकास आचार्य

लेटाङ २९ असार । १ हप्तादेखिको लगातारको वर्षाका कारण चिसाङ खोलामा आएको बाढीले लेटाङको जनजीवन प्रभावित भएको छ ।

लेटाङको चिसाङ र तेली खोलामा आएको बाढीले खोला छेउमा रहेका खेतीयोग्य जमिन कटान गर्नुका साथै चिसाङ खोलाको छेउमा रहेका विरन, कमलपुर र कीर्तिमानमा खोला पस्ने सम्भावना बढिरहेको छ ।

लेटाङ नगरपालिकामा रहेका भुवा जनता विकास पैनी, चिसाङ जनविकास पैनी, चिसाङ केभोलेन, तेली गडामे पैनी, टेक्राहा पैनीमा बाढीका कारण क्षति भएको छ ।

लेटाङमा सञ्चालित लेटाङ खानेपानी तथा जाँते खानेपानीको मुहान बगाउँदा खानेपानीको अभाव भएको छ ।

खोला छेउका बस्ती जोखिममा परेको भन्दै चिसाङ खोलाको छेउछाउमा रहेका बस्तीका बासिन्दालाई सचेत रहन लेटाङका नगरप्रमुख शङ्कर राईले आह्वान गरेका छन् । चिसाङ खोलाको विरनदेखि दक्षिणी कमलपुर तथा कीर्तिमान र वडा नं। २ को केही भागमा खोला बढेर बस्ती छिर्ने सम्भावना रहेको नगरप्रमुख राईले बताए ।

खोलाको बाँध भत्किने क्रम शुरु भएको र पानीको बहाब बढिरहेकाले सचेत रहन सबैलाई आग्रह गरिएको छ । हाल सो स्थानमा नेपाली सेना र इलाका प्रहरी कार्यलयको उद्धार टोली तैनाथ रहेको छ ।