लेटाङ, २१ फागुन । प्रतिनिधिसभा सदस्य निर्वाचनअन्तर्गत मोरङ क्षेत्र नं. १ मा पर्ने लेटाङ नगरपालिकाका सबै १४ मतदान स्थलमा मतदान शान्तिपूर्ण रूपमा सम्पन्न भएको छ।
अन्तिम तथ्याङ्क अनुसार लेटाङमा कुल १७ हजार ५४१ मत खसेको छ। जसमा पुरुष ७ हजार ९५६ र महिला ९ हजार ५८५ मतदाता रहेका छन्।
लेटाङ नगरपालिकामा कुल २९ हजार ५२३ मतदाता रहेकामा यसपटक करिब ५९.३४ प्रतिशत मतदान भएको देखिएको छ।
मतदान केन्द्र अनुसार लेटाङ–३ स्थित श्री आधारभूत विद्यालय बिरानटोल (बिरान स्कूल) मा सबैभन्दा बढी २ हजार ५४० मत खसेको छ भने लेटाङ–९ श्री मावि जाँते मा २ हजार ०९१, लेटाङ–८ जाँते मावि मा १ हजार ६८७ र लेटाङ–६ महाभारत मावि मा १ हजार ६३९ मत खसेको विवरण सार्वजनिक भएको छ।
सबै मतदान केन्द्रमा सुरक्षा व्यवस्था कडा पारिएको थियो भने कुनै अप्रिय घटना बिना शान्तिपूर्ण रूपमा मतदान सम्पन्न भएको निर्वाचन सम्बन्धित स्रोतले जनाएको छ।
प्रशान्त निराैला बिहिबार, फाल्गुण २१, २०८२
