लेटाङ , १९ भदाै । मोरङको लेटाङ नगरपालिका–२ फडानीमा खेतमा अजिङ्गरको बच्चा फेला परेपछि स्थानीयको पहलमा उद्धार गरिएको छ। करिब ३ किलो तौल रहेको अजिङ्गर फेला परेपछि जन चाहाना सामुदायिक वन उपभोक्ता समूहका अध्यक्ष खगेन्द्र नेपालको पहलमा सुरक्षित रूपमा उद्धार गरिएको हो।

अध्यक्ष नेपालका अनुसार स्थानीयले खेतमा अजिङ्गर देखेपछि जानकारी गराएका थिए। त्यसपछि वन समूहको पहलमा उद्धार गरिएको अजिङ्गरलाई डिभिजन वन कार्यालयमा बुझाउने तयारी भइरहेको छ। सो क्षेत्रमा यसअघि पनि अजिङ्गर भेटिँदै आएका कारण स्थानीयले थप सतर्कता अपनाउनुपर्ने अवस्था देखिएको छ।

फडानी क्षेत्रमा पछिल्लो समय खेतबारी तथा बस्ती आसपाससमेत अजिङ्गर देखिन थालेका छन्। करिब दुई साताअघि मात्रै सोही क्षेत्रबाट १० किलोभन्दा बढी तौलको अजिङ्गर उद्धार गरी सब–डिभिजन वन कार्यालयलाई बुझाइएको थियो। अजिङ्गर देखिएमा नजिक नजान, जिस्क्याउने वा मार्ने प्रयास नगर्न र तत्काल सम्बन्धित वन कार्यालय वा उद्धार टोलीलाई खबर गर्न अध्यक्ष नेपालले स्थानीयलाई आग्रह गर्नुभएको छ।